Hai sobat HenPedia.......
Kali ini HenPedia akan menyajikan sebuah dongeng yang diperoleh dari penutur asli yang berasal dari suku Sasak Lombok. Penutur dongeng ini bernama Ratnisah (alias Papuk Disok), berusia 97 tahun, dan berasal dari Desa Lebah Sempaga kecamatan Narmada.
Langsung disimak ya......... :)
"Terong Kuning dait Tegereneng Bawi"
Leq jaman laeq, tekisahan araq sopoq terune arane Tegereneng Bawi. Tegereneng Bawi ne terune saq solah dait gagah. Ye bebale kance due kance inaqne. Lueq anyamne manok.
Sopoq jelo Tegereneng Bawi beketuan leq inaqne. “O inaq, ndek naraq pisaq ku saq nine”, ongkatne. Terus inaq ne bejawab “O araq anakku, arane Terong Kuning”. “Leq mbe taokne, cobaq de lalo boyaqan ku”, ongkat Tegereneng Bawi malik. Terus inaq bejawab “aok, jemak ku lalo boyaqan”.
Konteq cerite, maraq jemaqne lalo ne inaqne Tegereng Bawi jok balen semetonne. Aran jaq ye bepisaq kance inan Terong Kuning. Wah dateng balen Terong Kuning. “Gong gong gong gong”, ongkat basong begogoq. “Ape gogoqne siq lok Cambre inaq”, ongkat Terong Kuning beketuan leq inaqne. “Sang naq kakembi jage”, ongkat inaqne nimbal. Terus ne tidok siq dedare (Terong Kuning) sini. “Oh, naq kakengku. Mbe de laiq nak kake?”, ongkat ne. “Ku pete sulir buaq sulir lekoq*”, ongkat nak kake nimbal. “Pheeeng… pheeeng…”, ongkat Terong Kuning betijoh. Ye betijoh sengaq ne siq aran Tegereng Bawi pisaq ne no. Beterus ngkah no, uleq bae inaqne Tegereneng Bawi. Dateng balene terus teketuan siq anakne “ Munjur ato malang inaq?”. Terus inaq bejawab “Malang”. Malang ne artine ndekne mele Terong Kuning leq Tegereneg Bawi. Laguq Tegereneng Bawi ndek man ne berputus asa, malik ne suruq inaqne lalo. Beterus lalo malik inaqne. “Munjur ato malang inaq?”, ongkat ne beketuan. “Malang”, ongkat inaqne bejawab. Ngeno-ngeno doang sampe telu kali masih ndekne mele doang dedare siq aran Terong Kuning no. Malah tetep ne betijoh sebilang ne te datengan siq naq kakene.
Nah, leq sopoq jelo, sengaq ne siq ndek mele doang dedare no, siq ne pandiq manok ne siq Tegereneng Bawi. Demen wah ngkah tepandiq ampok ne niatan adeqne lalo kesur tipaq balen laq Terong Kuning. Kesur ne terus jok balen Terong Kuning. Terus ceritene Terong Kuning ni nengkene nyesek. “Ceng ceng ceng ceng”, ongkatne nyesek. Demenne pacu-pacu nyesek, turun manok no tipaq taokne nyesek no. “Manok sai ne inaq”, ongkatne beketuan leq inaqne. “Sang manok kakambi jage” ongkatne bejawab inaqne. Ye ampoq ne bau manok no siq Terong Kuning ampok ne kurong ye terus. Sewahan no terus dateng Tegereneng Bawi jaq boyaq manokne. “Naq kake, ndek narak manok ku jok ti?”, ongkatne. “Oh wah ne bau siq adiq meq no, wah ne kurong ye”, ongkatne tejawab siq inaqne Terong Kuning. Ye ampok ne lalo sinter ye terus, ye endah ampok ne saling gitaq kance dedare siq aran Terong Kuning no. Demene wah pade saling gitaq, ye ni saq mame ni sekedar ne bait doang manokne ampok ne langsong uleq. Beterus Terong Kuning, sewahan ne saling gitaq kance loq Tegereneng Bawi, ye ampokne lemes lupek ndek ne taok angenne. Sewahan no terus ye ampoqne tirut mudiq loq Tegereng Bawi jok balene. Jarine ye atong diriq lah ling teparan laq Terong Kuning ni jok loq Tegereneng Bawi. Ye lekaq sambil ne belawas “Mbe taoq balen Tegereneng Bawi, jaq ku ketoq sai bale jaq salahanq. Mbe taoq balen Tegereneng Bawi, jaq ku ketoq sai bale jaq salahanq. Mbe taoq balen Tegereneng Bawi, jaq ku ketoq sai bale jaq salahanq”. Ye doang ongkatne belawas laq Terong Kuning sebelo rurong.
Sewahanno terus dateng ne balen loq Tegereneng Bawi. Terus demen ne gitaq dedare ni siq loq Tegereneng Bawi langsong ne impet lawang. Sengaq wahne te tolak jangke telu kalian, kane ye ndek mele loq Tegereneng Bawi. Laguq siq aran laq Terong Kuning wah ndek ne taok angene wah. Terus bukaan diriq ne lawang. Laguq saq mame ni tetep ndek ne mele. Siq ne perek laq Terong Kuning kadu jae. Sengaq ye laeq wahne tetijohan sebilang ne jok to inaqne. Laquq timaq ne ngeno, tetep ndekne mele uleq laq Terong Kuning, siq ndekne taok angenne. Nyesel beleq ye laeq ndeq terima loq Tegeneng Bawi. Nah, singket cerite sengaqne siq bekeras ate ndek mele uleq laq Terong Kuning ye ampok ne pade merarik.
Nah, nggak ne wah entah cerite ne ne. demene wah merariq ndek naraq uleq jok balene. Ngeno jarine. Ite tepesen siq dengan toaq. Timaq ne lenge dengan, timaq ne solah dengan, te bagus ntan te ngeraos. Ndeq te kanggo saq ngewade-wade no. Maraq base kane, ndek te kanggo saq cuek-cuek ngeno. Tebales te siq Allah ta’ale, lalo te nyunjut boyaq ye.
Tampi Asih